ரத்தம் தெறித்து செத்துப்
போகட்டும் தமிழினம்
ஓநாய் விருந்தில்
மானம் இழக்கட்டும் தமிழச்சி
கண் கட்டி கண்டவற்றில்
குண்டு பட்டு சாகட்டும் தமிழன்
பதுங்குகுழிகள் பாஸ்பரஸ் பூக்களுடன்
அடக்கம் செய்யப்படட்டும் பச்சை குழந்தை
அறுத்தெறியப் படட்டும்
அமுது தமிழ் பேசும் நாவும்- அந்நாவிற்கு
அமுதூட்டிய கொங்கையும்
எவனும் எப்படியும் செத்துத் தொலையட்டும்
குடும்பத்திற்கு பதவி பிரிப்பவர்
ஊரை விற்று வீட்டில் சேர்ப்பவர்
எவனாவது வாருங்கள்
இரண்டாயிரம் ரூபாய்,
கோழி பிரியாணி இரண்டு பார்சல்
மற்றும் ஒரு குவாட்டர் மட்டுமே
என் ஓட்டின் விலை
?