சில ரோஜாக்கள்

செருப்பைத் தொலைத்தபின்
எல்லோர்
கால்களையும் பார்த்தபடியே
வீடு வந்து சேர்ந்தேன்
o
காலைச்சுற்றும் நாய்களை
என்னால் பரிசளிக்க முடியாது
வருடலில் சுகம்காணும்
பூனைகளுமல்ல‌
உன் எண்ணங்களை எதிரொலிக்கும்
கிளியும் முடியாது
வளர்ப்பு பிராணியாய் இன்னும் மாறாத‌
உன் கருத்துகளில் மாறுபாடு கொண்ட‌
தனக்கான சுவர் படைக்கும் மனிதன் தருகிறேன்
புறக்கணிப்பாய் எனத் தெரிந்தும்.
o
கதவுக்குப் பின்னால்
துரோகம் ஒளியும் தெருக்களில்
ஊளையிட்டபடி இருக்கிறது தெரு நாய்
அறைகளில் ஊர்ந்து கொண்டிருக்கிறது
நெளி பாம்பென
மெளனம்
பேசுவதற்கு ஒன்றுமில்லாமல்
புன்னகைத்துக் கொள்கிறோம்
இரவில் இறந்து போனது
நட்பாய்க்கூட இருக்கலாம்
o
போன்சாய் மரங்களை
ஸ்கிரீன்சேவர் மீன்களை
ஃபிளாஷ் வெடிகளை
வரையப்பட்ட ஆறுகளை
பார்க்கும்
படைக்கும்
புதிய தலைமுறையொன்று
பின்னொரு நாளில்
கூகுளில் தேடும்
குடும்பத்தாரின் கான்டாக்ட் எண்ணை.
o