#11

சீண்டலில் நெரித்து
சிலிர்த்து வந்த சேவலை நீங்கள் பிடித்துவிட்டீர்கள்

தார்க்குச்சியினால் அல்ல
சாராயத்தினாலும் அல்ல
திறந்துவிடப்பட்ட வாடிவாசலின் வாசம்
அறிய ஓடிய காளையின் கொம்புதான்
உங்கள் கைகளில் இருப்பது

கூர்முனைகளின் ஆபத்துகளில்
சுவையறியாத உங்கள் கத்திகளை
ரசிக்கிறேன்

நாடகங்கள் போதும்
அடக்குவதின் ஆனந்தம் நிரந்தரமில்லை
அறுத்துவிடுங்கள்

அதற்காகத்தான் தன்னைக்கொடுத்தது
ஒரு மனம்.

o

#12

சிதறிய தலையை கனவில் கண்டபின்
வாகனத்தை முறுக்கிய ஒருவனுக்குத்தான்
தலைக்கவசத்தை பரிசளிக்க முயற்சி செய்தீர்கள்

அழிந்த உறுப்புகளைக் கண்டபின்
தன் விஷத்தைத் தொட்டவனை
உங்களால் காப்பாற்ற முடியாது

உங்கள்
முத்தங்களை
கண்ணீரை, நனிசொற்களை
மிச்சம் வைத்திருங்கள்

அவன் வருவான் ஒரு கையறு நிலையில்
அன்று நீங்கள்
தன்னகங்காரத்தைப் பூர்த்தி செய்துகொள்ளலாம்

நன்றி இதுவரை வந்ததற்கு.